ლევან მაჭავარიანი: იმედია, ევროპარლამენტში გონს მოეგებიან, რუკას დახედავენ და მიხვდებიან, რომ საქართველო ევროკავშირისთვის მნიშვნელოვანია

„ჩვენ გვაბრალებენ იმას, რაც რეალობაში არ არსებობს და სხვა ქვეყნების რეალურ პრობლემებზე არ საუბრობენ, რა თქმა უნდა, ჩვენი მოქალაქეების თვალში ეს სისულელეა და ამას ყურადღებას არავინ აქცევს“, - ამის შესახებ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა განაცხადა.

მისი თქმით, ევროპარლამენტში თუ რუკას დახედავენ, მიხვდებიან, რომ საქართველო მნიშვნელოვანია.

„ევროპარლამენტში უფრო დამაჯერებლები რომ იყვნენ, ვურჩევდი, რომ სხვა ქვეყნებზეც ისაუბრონ. ისაუბრონ უკრაინასა და მოლდოვაზე. ის, რომ ეს ორი ქვეყანა კორუფციაში იხრჩობა, ადამიანის უფლებები ირღვევა და ოპოზიციური პარტიები აკრძალეს.

თუ ისინი ამ ყველაფერზე ისაუბრებენ, მაშინ მათი უსაფუძვლო ბრალდებები შეიძლება, უფრო დამაჯერებელი იყოს. თუმცა, როცა მხოლოდ ჩვენ გვაბრალებენ იმას, რაც რეალობაში არ არსებობს და სხვა ქვეყნების რეალურ პრობლემებზე არ საუბრობენ, რა თქმა უნდა, ჩვენი მოქალაქეების თვალში ეს სისულელეა და ამას ყურადღებას არავინ აქცევს. გამოსავალია საუბარში, თუმცა სამართლიანი დისკუსია უნდა იყოს, თავისი არგუმენტებით და შინაარსით.

იმედია, ისინი გონს მოეგებიან, რუკას დახედავენ და მიხვდებიან, რომ საქართველო ევროკავშირისთვის მნიშვნელოვანია. იმასაც შეეგუებიან, რომ რევოლუციითაც ვერ ჩაგვანაცვლეს, რომელიც ხუთჯერ სცადეს, ვერც არჩევნებით დაგვამარცხეს, წინასაარჩევნო კამპანია აგენტურულ ძალებს თავად ჩაუტარეს“, - აღნიშნა მმართველი გუნდის დეპუტატმა.