ლევან მახაშვილი: 4 ოქტომბერს აქციაზე მისული ნებისმიერი პიროვნების სურვილი იყო ხელისუფლების დამხობა, შემდეგ გამიჯვნა დაიწყეს, რაც პასუხისმგებლობიდან გაქცევაა

მოსახლეობას ვეუბნებოდით, რომ 4 ოქტომბერი, სახელმწიფოებრივი თვალსაზრისით, მშვიდად, წყნარად ჩაივლიდა და ასეც მოხდა, – ამის შესახებ პარლამენტის ევროინტეგრაციის კომიტეტის თავმჯდომარე ლევან მახაშვილმა განაცხადა.

მისი თქმით, 4 ოქტომბერი არა სპონტანური პროცესი, არამედ სახელმწიფო ხელისუფლების დამხობის აქცია იყო.

„მათი გადმოსახედიდან დიადი მიზნით იყო შესრულებული, მაგრამ რეალურად, უფხოდ და უნიათოდ, როგორც ერთ-ერთ ლიტერატურულ ნაწარმოებშია „ხმამაღლა წაკითხული გადატრიალების მცდელობა“. მოსახლეობას ვეუბნებოდით, რომ 4 ოქტომბერი, სახელმწიფოებრივი თვალსაზრისით, მშვიდად, წყნარად ჩაივლიდა. ასეც მოხდა. შფოთის შემოტანა ვინც სცადა, რა თქმა უნდა, მათთვის 4 ოქტომბერი მშვიდობიანად ვერ დასრულდებოდა. შემდგომ დღეებს ზოგიერთი მათგანი პენიტენციურ დაწესებულებაში გაატარებს. 4 ოქტომბერი არა სპონტანური პროცესი, არამედ სახელმწიფო ხელისუფლების დამხობის აქცია იყო. ამიტომ, იქ მისული ნებისმიერი პიროვნება მონაწილე და მსურველი იყო ხელისუფლების დამხობის. შემდეგ გამიჯვნა დაიწყეს, რაც უბრალოდ პასუხისმგებლობიდან გაქცევაა. როდესაც გემი იძირება, ყველა ცდილობს, თავს უშველოს და პასუხისმგებლობა სხვას გადააბაროს. ახლა ისე გამოდის, თითქოს, ამ პროცესში დამნაშავეები მარტო პაატა ბურჭულაძე, პაატა მანჯგალაძე და სხვები არიან. რა თქმა უნდა, ყველას თავისი წილი აქვს. ყველამ ძალიან კარგად იცოდა, ვინც იმ აქციაზე იდგა, რა იგეგმებოდა და რას აპირებდნენ ეს ადამიანები. თუმცა, როგორც ჩანს, ის, რაც ზოგიერთმა არ იცოდა, ან ვერ გაიგო, იყო ის, რომ სახელმწიფო ინსტიტუტები მოწოდების სიმაღლეზე არიან და ნებისმიერ მცდელობას შესაბამისი ეფექტიანი პასუხი ექნება“, – განაცხადა ლევან მახაშვილმა.