შალვა პაპუაშვილი: ის, რომ 3000 წელია, სახელმწიფოებრიობას ასე ვატარებთ, იმის მანიშნებელია, რომ გამომუშავებული გვაქვს შინაგანი ფორმულა, თუ როგორ უნდა გაიარო ის ქარიშხლები, რომლებიც ასეთ რთულ რეგიონში ხდება ხოლმე

გეოგრაფია არ შეიცვლება, ჯერჯერობით გეოგრაფიასთან ომი არავის მოუგია, - განაცხადა გადაცემაში „იმედი LIVE“ პარლამენტის თავმჯდომარემ შალვა პაპუაშვილმა.

მან უპასუხა კითხვას - „თქვენი ოპონენტები ამბობენ, რომ საქართველოს ჩანაცვლება ხდება სომხეთით. ასეა ეს?“

„არა, საქართველოს ჩანაცვლება ხდება გეოგრაფიის, გეოპოლიტიკის, ისტორიის, ეკონომიკის უვიცობით. ამდენად არაკვალიფიციურ ხალხთან გვაქვს საქმე და ეს პირდაპირ ვნახეთ, როდესაც ერთ-ერთი ჟურნალისტი ევროპარლამენტში, მათ შორის საფრანგეთის ერთ-ერთ მინისტრთან მივიდა, აჩვენა რუკა, ირანი დამანახეო და ვერ აჩვენეს. და ამ ხალხმა უნდა გადაწყვიტოს დღეს გლობალური საკითხები. ასე რომ, გეოგრაფია არ შეიცვლება, ჯერჯერობით გეოგრაფიასთან ომი არავის მოუგია. ეს უპირველესად ჩვენ ვიცით, ის ტურბულენტური რეგიონი, რომელშიც ჩვენ ისტორიულად ვიყავით და დღესაც ასეთია, ასეთი იქნება, ალბათ, და ის, რომ ჩვენ 3000 წელია, ჩვენს სახელმწიფოებრიობას ასე ვატარებთ, ეს იმის მანიშნებელია, რომ გამომუშავებული გვაქვს შინაგანი ფორმულა, თუ როგორ უნდა გაიარო ის ქარიშხლები, რომლებიც ასეთ რეგიონში ხდება ხოლმე. რაც შეეხება ევროპას, ევროპამ ბევრჯერ წაიტეხა ცხვირი ასეთი ტურბულენტობის დროს, ხან თვითონ იყო ინიციატორი, ხან მსხვერპლი, მაგრამ ბევრჯერ ვერ შეძლო, საკუთარი ხალხისთვის აერიდებინა სხვადასხვა სახის ომი და უბედურება“, - განაცხადა პაპუაშვილმა.