ირაკლი ქადაგიშვილი: ჭირიც და ლხინიც ქართველ ერს და საქართველოს ეკლესიას ერთად აქვთ გავლილი - როდესაც ეკლესიას მოიხსენიებ რაღაცის ქსელად, არ აქვს მნიშვნელობა, ეს რუსეთი იქნება თუ ნებისმიერი სხვა, ეს ნიშნავს, რომ შენ პატივს არ სცემ ქართველ ერს

ჭირიც და ლხინიც ქართველ ერს და საქართველოს ეკლესიას ერთად აქვთ გავლილი. კონსტიტუციაში გვიწერია, რომ საქართველოს მართლმადიდებელი ავტოკეფალიური ეკლესია არის საქართველოს ისტორიის განუყოფელი და ფუძემდებელი ნაწილი, - განაცხადა გადაცემაში „იმედი კვირა“ რეგიონული პოლიტიკისა და თვითმმართველობის საპარლამენტო კომიტეტის თავმჯდომარემ, ირაკლი ქადაგიშვილმა.

მისი შეფასებით, საქართველოს მართლმადიდებელი ეკლესიის „რაღაცის ქსელად“ მოხსენიება, როგორც ევროპარლამენტის რამდენიმე კვირის წინანდელ რეზოლუციაში მოხდა, ქართველი ერისა და სახელმწიფოს მიმართ უპატივცემულობას ნიშნავს.

„როდესაც მას მოიხსენიებ რაღაცის ქსელად, არ აქვს მნიშვნელობა, ეს რუსეთი იქნება თუ ნებისმიერი სხვა, რა თქმა უნდა, ეს ნიშნავს, რომ შენ პატივს არ სცემ ქართველ ერს, ქართველი ერის ისტორიას, საქართველოს სახელმწიფოებრიობას და კონსტიტუციას”, - აღნიშნა ირაკლი ქადაგიშვილმა.

იგი ასევე იხსენებს NDI-ის კვლევებს, სადავ ეკლესიის მიმართ ნდობა გარკვეულ პერიოდში შემცირებულად იყო ასახული და მიზანი ამ შემცირების გაგრძელება იყო.

„იყო ასეთი ცნობილი ფაქტი იყო, რომელიც NDI-სთან იყო დაკავშირებული, სადაც სხვადასხვა დროს ჩატარებული კვლევების დიაგრამა ჰქონდათ გაკეთებული, თუ რა დინამიკა ჰქონდა ეკლესიისადმი ნდობას და მათი კვლევის მიხედვით რაღაც მომენტში ცოტა შემცირებული იყო [ნდობა]. სამიზნე იყო, რომ ეს შემცირება მუდმივად გაგრძელებულიყო. ამიტომ ეს მოვლენა არახალია”, - აღნიშნა ირაკლი ქადაგიშვილმა.