ირაკლი ქადაგიშვილი ევროპარლამენტისა და მოლდოვის მხრიდან ქართულ თავისუფალ მედიაზე თავდასხმაზე: ევროპა მიდის უკან - საბჭოთა კავშირისაკენ. სამწუხაროდ, ეს რეალობა გვაქვს სიტყვის თავისუფლებასთან დაკავშირებით

უკან საბჭოთა კავშირში, - ასე აფასებენ მმართველი პარტიის წარმომადგენლები ევროპარლამენტისა და მოლდოვის ხელისუფლების მხრიდან ქართულ თავისუფალ მედიაზე მორიგ თავდასხმას. მათი თქმით, ევროპარლამენტსა და მოლდოვას ქართული მედიების წინააღმდეგ არანაირი სამართლებრივი არგუმენტი არ გააჩნია, შესაბამისად აღნიშნული ქმედება მხოლოდ დემოკრატიასა და სიტყვის თავისუფლებაზე თავდასხმად შეიძლება შეფასდეს.

„მიზანი არის ერთი რამ, რომ ადამიანების აზროვნება და მათი პოლიტიკური განწყობები მხოლოდ და მხოლოდ ე.წ. პოლიტკორექტული მედიით უნდა ხორციელდებოდეს. ანუ ეს არის თანამედროვე ენაზე მოთქმული მიდგომა, რასაც საბჭოთა კავშირის დროს მარტივად ერქვა - საბჭოთა იდეოლოგია უნდა ყოფილიყო ყველა მედიის განმსაზღვრელი. ევროპა მიდის უკან - საბჭოთა კავშირისაკენ. სამწუხაროდ, ეს რეალობა გვაქვს სიტყვის თავისუფლებასთან დაკავშირებით”, - განაცხადა პარლამენტის რეგიონული პოლიტიკისა და თვითმმართველობის კომიტეტის თავმჯდომარემ, ირაკლი ქადაგიშვილმა.

ევროპარლამენტმა ტელეკომპანია „იმედს” საქმიანობა 1 წლით აუკრძალა. მოლდოვამ კი სამ ქართულ მაუწყებელს - „იმედს”, „რუსთავი ორსა“ და „პოსტივის“ აკრედიტაციაზე უარი განმარტების გარეშე უთხრა.