"რა თქმა უნდა, შემოაღწევს ჩვენთან, საქართველო მთვარეზე არ არის, დედამიწაზეა" - პაატა იმნაძე ვირუსის ახალ შტამზე

"კორონავირუსის ახალი შტამი, ომიკრონი, საქართველოშიც ადრე თუ გვიან, შემოვა", - ამის შესახებ დაავადებათა კონტროლის ეროვნული ცენტრის დირექტორის მოადგილე, პაატა იმნაძემ "პალიტრას" ეთერში განაცხადა.

იმნაძის გათვლებით, ეს დაახლოებით ერთ თვეში მოხდება. 

როგორც დაავადებათა კონტროლის ეროვნული ცენტრის დირექტორის მოადგილე განმარტავს, ახალი შტამი სწრაფად ვრცელდება, რაც ნებისმიერ ქვეყანაში სამედიცინო დახმარების სისტემების გადატვირთვას გამოიწვევს.

"რა თქმა უნდა, შემოაღწევს ჩვენთან, საქართველო მთვარეზე არ არის, დედამიწაზეა.

ჩვენ გამალებული ურთიერთობა და აფრიკასთან დღეში რამდენიმე რეისი არ გვაქვს, განსხვავებით ევროპისგან.

ვნახოთ, დაახლოებით ერთი თვე უნდა გვქონდეს მარაგში, რომ წინასწარ ვიცოდეთ ზუსტად რასთან გვექნება საქმე.

სწრაფი გავრცელება ვირუსის ერთ-ერთი ყველაზე ძლიერი მახასიათებელია.

სწრაფი გავრცელება ნიშნავს, რომ უამრავი ადამიანი ერთდროულად ხდება ავად, რაც ნებისმიერ ქვეყანაში იწვევს სამედიცინო დახმარების სისტემების გადატვირთვას.

ყველაზე მეტად ის გვაწუხებს, რომ ზამთარს ვხვდებით ისე, რომ მოსახლეობის მესამედია ორჯერადად აცრილი, ეს ძალიან გვაწუხებს.

ამას თუ უახლოეს პერიოდში კოვიდგადატანილებსაც დავამატებთ, ვისაც დღეს აქვს იმუნიტეტი, ეს იქნება ჩვენი მოსახლეობის დაახლოებით 60%-მდე.

ჩვენი მოსახლეობის თითქმის ნახევარი ვირუსის ამთვისებელია.

ეს არის ძალიან დიდი ფიჩხი, რომელიც ყოველ წუთს შეიძლება ისევ აგიზგიზდეს.

ჩვენ რომ 4 000-ს ჩამოვცდით ეს არაფერს ნიშნავს, ერთ-ორ კვირაში ისევ დაიწყება მატება და ეს შემაშფოთებელი პროგნოზია", - განაცხადა პაატა იმნაძემ.

კორონავირუსის ახალი შტამი, "ომიკრონი", ჯერჯერობით მსოფლიოს 15 ქვეყანაშია გავრცელებული.

საქართველოს მთავრობის გადაწყვეტილებით, ქვეყნის ტერიტორიაზე ნებისმიერი პირი, მოქალაქეობის მიუხედავად, რომელსაც ბოლო 14 დღის განმავლობაში, აქვს აღნიშნულ აფრიკულ ქვეყნებში მოგზაურობის ისტორია, საქართველოში შემოსვლისას ექვემდებარება 14-დღიან იზოლაციას/კარანტინს საკარანტინე სივრცეში.

კორონავირუსის ახალი ვარიანტი სამხრეთ აფრიკის რესპუბლიკის მეცნიერებმა აღმოაჩინეს, რომელსაც ბევრი მუტაცია აქვს. მეცნიერების განცხადებით, ახალ ვარიანტს, რომლის სამეცნიერო ხაზის ნომერია B.1.1.529, სულ მცირე 10 მუტაცია აქვს, რამაც ქვეყანაში ინფიცირების რიცხვის ზრდა გამოიწვია.

ჯანდაცვის მსოფლიო ორგანიზაციამ ვირუსის ახალ შტამს შემაშფოთებელი უწოდა და მას სახელი „ომიკრონი“ მიანიჭა.

კორონავირუსის ახალი ვარიანტის გავრცელების გამო, ევროკავშირმა და მსოფლიოს რამდენიმე ქვეყანამ სამხრეთ აფრიკულ ქვეყნებთან ფრენების დროებით შეჩერების გადაწყვეტილება მიიღეს.

ამავე თემაზე:

🔲 „ომიკრონი" ჯანმომ ყველაზე საშიში შტამების სიაში შეიტანა

🔲  რომელ ქვეყნებში დაფიქსირდა ვირუსის ახალი შტამი "ომიკრონი"

🔲 „კოვიდ-19“-ის ახალი შტამი შეიძლება, ორჯერ აცრილ ადამიანებშიც გავრცელდეს - ბრიტანეთის პრემიერ-მინისტრი

🔲 კორონავირუსის ახალი შტამი „ომიკრონი“ უმრავლეს შემთხვევაში აუცრელ მოქალაქეებს უდასტურდებათ - გიორგი კამკამიძე