ჯანმოს საგანგაშო პროგნოზი: ევროპაში COVID-ით დაღუპულთა საერთო რაოდენობამ მარტში შესაძლოა 2,2 მილიონს გადააჭარბოს

„ევროპაში COVID-ით დაღუპულთა საერთო რაოდენობამ მარტში შესაძლოა 2,2 მილიონს გადააჭარბოს“, - ამის შესახებ ჯანდაცვის მსოფლიო ორგანიზაცია აცხადებს.

„როიტერის“ ცნობით, ჯანდაცვის მსოფლიო ორგანიზაციამ (WHO) დღეს განაცხადა, რომ მარტისთვის ევროპაში COVID-19-ით კიდევ 700,000 ადამიანი შეიძლება დაიღუპოს, რაც საერთო ჯამში 2,2 მილიონს გადააჭარბებს.

ჯანმო, გამოსავალს მხოლოდ ვაქცინაციაში ხედავს და ხალხს აცრისკენ მოუწოდებს.

„ევროპა ჯერ კიდევ პანდემიის „ძლიერ მარწუხებში“ იმყოფება. დაღუპულთა ყოველდღიური რაოდენობა დაახლოებით 4 ათას  200-მდე გაიზარდა, რაც სექტემბრის ბოლოს მონაცემებთან შედარებით ორჯერ მეტია. რეგიონის 53 ქვეყანაში კორონავირუსით დაღუპულთა საერთო რაოდენობამ მილიონ ნახევარს გადააჭარბა“, - განაცხადა ჯანდაცვის მსოფლიო ორგანიზაციის ევროპის რეგიონის ხელმძღვანელმა. 

შეგახსენებთ, ვენაში ვაქცინაცია 2022 წლიდან სავალდებულო იქნება, ავსტრიაში კი პანდემიის დაწყებიდან  საყოველთაო კარანტინი უკვე მეოთხედ გამოცხადდა. ბელგიაში  დისტანციური მუშაობა და პირბადის ტარება სავალდებულო იქნება, ხოლო ჩეხეთი არავაქცინირებული მოსახლეობისთვის წესებს ამკაცრებს. გერმანიამ უკვე გაამკაცრა ზომები: დაიკეტა ზოგიერთი საჯარო დაწესებულება და ხელისუფლება ვაქცინაციის ტემპის გასაზრდელად სხვადასხვა ღონისძიების გატარებას გეგმავს. შეზღუდვები გამკაცრდა საბერძნეთში არავაქცინირებულ პირებზე.

ასევე დაგაინტერესებთ:

🔵 ადამიანებზე „ალცაიმერის“ საწინააღმდეგო ვაქცინის გამოცდა იწყება

🔵 აზარტულ თამაშებში ჩართული ადამიანებისა და სუიციდის მსხვერპლთა რიცხვი საქართველოში საგანგაშო ნიშნულზეა