ევროპარლამენტმა ევროკავშირში მესამე ქვეყნების ლობირების გამჭვირვალობასა და შესაბამისი რეესტრის შექმნის შესახებ კანონს მხარი დაუჭირა

ევროპარლამენტმა მიიღო ახალი კანონი, რომელიც ევროკავშირში მესამე ქვეყნების ლობირებას უფრო გამჭვირვალეს გახდის. ევროპარლამენტის გვერდზე გამოქვეყნებულ ინფორმაციაშია აღნიშნულია, რომ კანონს მხარი 392 კანონმდებელმა დაუჭირა, წინააღმდეგი 88 იყო, თავი კი 133-მა შეიკავა.

ახალი წესების მიხედვით, თითოეული ქვეყანა შექმნის ლობისტების რეესტრს, რომელსაც დამოუკიდებელი ორგანო მართავს და უზრუნველყოფს მონაცემების სიზუსტეს. რეესტრებს ერთმანეთთან ერთიანი პორტალი დაუკავშირებს.

კანონი მიზნად ისახავს მხოლოდ იმ ორგანიზაციების რეგისტრაციას, რომლებიც კონკრეტულად ფულის სანაცვლოდ ცდილობენ უცხო ქვეყნის ინტერესების წარმოდგენას ევროკავშირში, მაგრამ არა ჟურნალისტებს, ადვოკატებს, აკადემიკოსებს თუ ჩვეულებრივ სამოქალაქო ორგანიზაციებს.

ცვლილება ეხება ლობისტურ საქმიანობას, რომლისთვისაც იღებენ ფულს ან სხვა ანაზღაურებას და ცდილობენ, გავლენა იქონიონ ევროკავშირის პოლიტიკაზე, კანონებზე ან გადაწყვეტილებებზე. ასეთ საქმიანობად ითვლება, მაგალითად, შეხვედრებისა და კონფერენციების ორგანიზება, საჯარო კონსულტაციებში მონაწილეობა, საინფორმაციო კამპანიების წარმართვა (მათ შორის ბლოგერების და ინფლუენსერების ჩართულობით).

ამასთან, თუ სამოქალაქო ორგანიზაცია იღებს გრანტს სხვა ქვეყნიდან, მაგრამ ეს გრანტი ლობირებას არ უკავშირდება (მაგალითად, ადამიანის უფლებების დაცვა, გარემოს დაცვა და ა.შ.), მაშინ ეს არ განიხილება ანაზღაურებად და ორგანიზაციას ლობისტთა სიაში რეგისტრაცია არ მოეთხოვება.

კანონმდებლები აღნიშნავენ, რომ რეგისტრაცია ლობისტების მიმართ უნდობლობას არ უნდა იწვევდეს.