გერმანიის მთავრობა საქართველოს, კოვიდით დაზარალებული ოჯახების დასახმარებლად 3 მლნ ევროს გამოუყოფს

გერმანიის მთავრობა საქართველოს 3 მლნ ევროს მოცულობის გრანტს გამოუყოფს, - ინფორმაციას საქართველოში გერმანიის საელჩო ავრცელებს.

აღნიშნული ინფორმაციის თანახმად, შესაბამის შეთანხმებას საქართველოს ფინანსთა მინისტრმა ლაშა ხუციშვილმა და გერმანიის რეკონსტრუქციის საკრედიტო ბანკის (KfW) სამხრეთ კავკასიის ოფისის ხელმძღვანელმა ბირგიტ ჰოლდერიდ-კრესმა მოაწერეს ხელი.

გამოყოფილი გრანტი, კოვიდ პანდემიისაგან დაზარალებული ოჯახების სოციალურ დაცვას უნდა მოხმარდეს.

საელჩოს ცნობით,  ეს გრანტი დაემატება გერმანიის მიერ გასულ წელს პანდემიის წინააღმდეგ საბრძოლველად უკვე გამოყოფილ დახმარებას, რომელიც 5,8 მილიონი ევროს ოდენობის გრანტისა და 15 მილიონი ევროს ოდენობის დაბალპროცენტიანი კრედიტისაგან შედგებოდა.

"ამ დახმარების მიზანს ეკონომიკური შედეგების შემსუბუქება წარმოადგენდა იმ ქართული ოჯახებისათვის, რომლებმაც კოვიდ პანდემიის გამო დაკარგეს შემოსავალი.

გაზრდილი თანხით დაფინანსდება 135 ათასზე მეტი გადახდა სოციალურად დაუცველი ოჯახებისათვის.

ამავე დროს 2020 წელს გაცემული კრედიტის მეშვეობით შესაძლებელი იქნება, განხორციელდეს უმუშევართა შემწეობის 280 ათასზე მეტი გადახდა შესაბამისი პირებისათვის.

ეს მხარდაჭერა თავის წვლილს შეიტანს არა მხოლოდ მრავალი ოჯახის სოციალური დაცვის საქმეში, არამედ ასევე სოციალური დაცვის სისტემის გაძლიერებაში", - ნათქვამია გერმანიის საელჩოს ინფორმაციაში.

ასევე დაგაინტერესებთ:

🔲 აშშ-ში "ომიკრონის" პირველი შემთხვევა დაფიქსირდა - ინფიცირებული პირი სრულად ვაქცინირებულია

🔲 "შესაძლოა ექსპერიმენტულმა საღეჭმა რეზინამ 95%-ით შეაჩერა კოვიდის გავრცელება - 2022 წელი იქნება კოვიდის კონტროლის წელი" - გიორგი ფხაკაძე

🔲 თენგიზ ცერცვაძე: ინფიცირებიდან 8-10 დღის განმავლობაში თუ მოგვმართავენ, დღეს გვაქვს ისეთი მედიკამენტები, რომ მათი უმრავლესობა დაავადების დამძიმებას თავიდან აიცილებს