ლევან მაჭავარიანი: ვატყობთ, რომ რაც ბატონმა დონალდ ტრამპმა დაიკავა ოვალური კაბინეტი, აბსოლუტურად სრული თანხვედრაა ჩვენს პოზიციებში

ვატყობთ, რომ რაც ბატონმა დონალდ ტრამპმა დაიკავა ოვალური კაბინეტი, აბსოლუტურად სრული თანხვედრაა ჩვენს პოზიციებში. არა მხოლოდ ევრობიუროკრატებთან მიმართებაში - ღირებულებების ნაწილში, ომთან დაკავშირებით, უკრაინასთან დაკავშირებით. ფაქტობრივად არცერთ საკითხში არ არის აცდენა, - განაცხადა ლევან მაჭავარიანმა „დღის ქრონიკაში“.

ფრაქცია „ქართული ოცნების“ თავმჯდომარის პირველი მოადგილე აშშ-ის მიერ ევროპელი პოლიტიკოსებისთვის სანქციების დაწესებას გამოეხმაურა.

„როდესაც ამერიკის შეერთებული შტატები ახლა ასწავლის ევროკავშირს და ევრობიუროკრატებს, თუ რა არის ჭეშმარიტი ევროპული ღირებულებები, იქ ძალიან მწვავედ უყენებენ საკითხს ცენზურასთან და საწინააღმდეგო აზრის ჩახშობასთან დაკავშირებით. ეს სანქციები სწორედ ამას ემსახურებოდა. ძალიან კარგია, ბუმერანგის პრინციპით უბრუნდებათ ის უსამართლო გადაწყვეტილებები, რაც ჩვენს ქვეყანასთან მიმართებაში იყო.

ევრობიუროკრატები კარგად უნდა დაფიქრდნენ, რომ ეს პრეტენზიები და ფაქტებსა და არგუმენტებზე დაფუძნებული ბრალდებები მხოლოდ საქართველოდან აღარ მიდის. კიდევ ერთხელ შევახსენებ მაყურებელს, რომ ჩვენ თავს არავის ვესხმით, უბრალოდ ვალდებულები ვიყავით, რომ იქიდან მომავალ უსამართლობაზე პასუხი გაგვეცა, ვინაიდან ჩვენ დაბალი ღობე არავისთვის ვართ. შესაბამისად., ვითხოვთ თანასწორ დამოკიდებულებას ნებისმიერი პარტნიორის მხრიდან“, - განაცხადა მაჭავარიანმა.