ნინო წილოსანი: ის პროცესი, რომელიც ქართული მედიასაშუალებების წინააღმდეგ არის დაწყებული, არა მხოლოდ ქართულ, არამედ იმ ცენზურის ჭრილში შეგვიძლია განვიხილოთ, რომელსაც აშშ აკრიტიკებს

ის პროცესი, რომელიც ქართული მედიასაშუალებების წინააღმდეგ არის დაწყებული, არა მხოლოდ ქართულ, არამედ იმ ცენზურის ჭრილში შეგვიძლია განვიხილოთ, რომელსაც აკრიტიკებს ამერიკის შეერთებული შტატები, - განაცხადა გადაცემაში „იმედი LIVE“ პარლამენტის თავმჯდომარის მოადგილე ნინო წილოსანმა.

მისივე თქმით, ქართული, თავისუფალი სიტყვის წინააღმდეგ ბრძოლა არ დაწყებულა არც მოლდოვაში და არც ევროპარლამენტში.

„იმედის“, „პოსტივის“ და ზოგადად დამოუკიდებელი ქართული მედიასაშუალებების წინააღმდეგ უკვე ბევრი წელია, მიდის აქტიური მუშაობა, მათ შორის განსაკუთრებით ადგილობრივი აგენტურა [მუშაობს], რომელიც აქედან გარეთ აგზავნის ინფორმაციებს. ეს ყველაფერი გაცხადებულად დაიწყო ბრიტანეთის სანქციებით. ეს იყო უპრეცედენტო გადაწყვეტილება. როგორც ვხედავთ, იქაც უკვე აქტიურად მუშაობს არაფორმალური პოლიტიკური გავლენები, რომლის დაკვეთებსაც ყველანაირი საფუძვლის გარეშე ასრულებენ. თუ მათ პოლიტიკურ ნარატივში არ ჯდება, ყველაფერი სხვა არის მიუღებელი. არსებობს კარგად დამუშავებული ტაქტიკა, რაც გულისხმობს იმას, რომ პირდაპირ მიაკრა იარლიყი „რუსული“, ეს არის უკვე გამზადებული ფორმულა, თუ როგორ შეგიძლია აკრძალო, დაასანქცირო. მოლდოვის გადაწყვეტილება ნამდვილად ზის ამ ქვეყნის მმართველების ქცევის ჟანრში. ეს არის ქვეყანა, რომლის მმართველიც აცხადებს, რომ მზად არის, გააუქმოს საკუთარი ქვეყნის დამოუკიდებლობა და შეუერთოს მეზობელ ქვეყანას“, - განაცხადა ნინო წილოსანმა.