საქართველოს სტარტაპ ეკოსისტემა Dealroom-ის გლობალურ რუკაზე დაემატა

ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს ინიციატივით, ქვეყნის ტექნოლოგიურ და ინოვაციურ განვითარებაში ახალი ეტაპი იწყება - საქართველოს სტარტაპ ეკოსისტემა Dealroom-ის გლობალურ რუკაზე დაემატა.

Dealroom წარმოადგენს წამყვან გლობალურ პლატფორმას და მსოფლიო სტარტაპ ეკოსისტემების ციფრულ რუკას, რომელიც ერთ სივრცეში აერთიანებს დეტალურ ინფორმაციას სტარტაპებზე, ინვესტორებზე, უნივერსიტეტებზე, მსხვილ კომპანიებსა და ინოვაციურ ინსტიტუციებზე.

პლატფორმა აქტიურად გამოიყენება ეკოსისტემების წარმოჩენისა და ვიზუალიზაციისთვის, სტარტაპებისა და მასშტაბირებადი კომპანიების მონაცემთა ეფექტური მართვისთვის, საერთაშორისო ინვესტორებისა და ვენჩურული ფონდების იდენტიფიცირებისთვის, ბაზრის უახლესი ტენდენციების დეტალური ანალიზისა და ქვეყნის ტექნოლოგიური პოტენციალის საერთაშორისო ხილვადობის გასაზრდელად.

აღნიშნული პარტნიორობა საქართველოს აძლევს უნიკალურ შესაძლებლობას, შექმნას სტარტაპ ეკოსისტემის ერთიანი, გამჭვირვალე და სტრუქტურირებული მონაცემთა ბაზა, სადაც თავმოყრილი იქნება ყველა საჭირო ინფორმაცია.

ეს ნაბიჯი მნიშვნელოვნად გაზრდის ქართული სტარტაპების საერთაშორისო ცნობადობას, გაამარტივებს უცხოური ინვესტიციების მოზიდვის პროცესს და დაეხმარება როგორც კერძო, ისე სახელმწიფო სექტორს მონაცემებზე დაფუძნებული გადაწყვეტილებების მიღებაში. შედეგად, კიდევ უფრო გამყარდება საქართველოს პოზიციონირება გლობალურ ტექნოლოგიურ რუკაზე.

საქართველოს ინტეგრაცია Dealroom-ის გლობალურ პლატფორმაზე არის სტრატეგიული ნაბიჯი, რომელიც ადგილობრივ ქვეყნის სტარტაპ ეკოსისტემას მსოფლიო კაპიტალთან და გლობალურ ბაზრებთან დააკავშირებს.