შალვა პაპუაშვილი: კმაყოფილი ვართ იმ დინამიკით, რომელიც არის ქართულ-ამერიკულ ურთიერთობაში

„ჩვენ კმაყოფილი ვართ იმ დინამიკით, რომელიც არის ქართულ-ამერიკულ ურთიერთობაში“, - განაცხადა საქართველოს პარლამენტის თავმჯდომარემ.

მისი თქმით, ყველა მაღალი დონის შეხვედრაზე ქართული მხარე აფიქსირებს, რომ მზად არის დაიწყოს სუფთა ფურცლიდან ურთიერთობა.

„პრემიერ-მინისტრმა განაცხადა, რომ გაეროში ყოფნის დროს ჰქონდა მას შესაძლებლობა, რომ აშშ-ის პრეზიდენტის მიწვევით დასწრებოდა მიღებას და ჰქონდა მათ შორის შესაძლებლობა, რომ მოკლე გასაუბრება ჰქონოდა, როგორც პრეზიდენტთან, ასევე, უფრო დეტალური გასაუბრება სახელმწიფო მდივანთან. ჩვენ ასეთი ურთიერთობების დროს ყოველთვის ვაფიქსირებთ კიდევ ერთხელ ჩვენს მზაობას, რომ ახალი ათვლის წერტილით დაიწყოს ჩვენი სტრატეგიული პარტნიორობა. დანარჩენი დამოკიდებულია მათზე, ვინც უპასუხებს ამ ჩვენს მზაობას. ასე, რომ ჩვენ კმაყოფილი ვართ იმ დინამიკით, რომელიც არის ქართულ-ამერიკულ ურთიერთობაში. სამწუხაროდ, ძალიან დააზიანა წინა ადმინისტრაციამ ეს ურთიერთობები და მნიშვნელოვანია, რომ ეს ზიანი აღმოიფხვრას და ახალი ფურცლიდან დაიწყოს ურთიერთობა“, - განაცხადა შალვა პაპუაშვილმა.

საქართველოს პრემიერ-მინისტრი ირაკლი კობახიძე ნიუ-იორკში ამერიკის შეერთებული შტატების პრეზიდენტ დონალდ ტრამპის ოფიციალურ მიღებას დაესწრო.

საქართველოს მთავრობის ინფორმაციით, მიღება 22 სექტემბერს ნიუ-იორკში გაეროს გენერალური ასამბლეის 81-ე სესიაში მონაწილე სახელმწიფოთა ლიდერების პატივსაცემად გაიმართა.