მაკა ბოჭორიშვილი: მშვიდობა რეგიონში და ურთიერთობები, რაც არსებობს საქართველოს, სომხეთსა და აზერბაიჯანს შორის, გადამწყვეტ როლს ითამაშებს „შუა დერეფნის“ განვითარებაში, რაც არის ისტორიული შანსი ჩვენი რეგიონისთვის

ერთის მხრივ მშვიდობა და სტაბილურობა რეგიონში, მეორეს მხრივ ეს ურთიერთობები, რაც არსებობს საქართველო-სომხეთს, საქართველო-აზერბაიჯანს და ახლა უკვე აზერბაიჯანსა და სომხეთს შორის გადამწყვეტ როლს ითამაშებს „შუა დერეფნის“ განვითარებაში, რაც შეიძლება მართლა ვთქვათ, რომ არის ისტორიული შანსი ჩვენი რეგიონისთვის, - განაცხადა „დღის ქრონიკასთან“ საგარეო საქმეთა მინისტრმა მაკა ბოჭორიშვილმა.

მისი თქმით, არის შანსი, რომ „შუა დერეფნის“ განვითარებით რეგიონი იქცეს უმნიშვნელოვანეს გეოპოლიტიკურ ადგილად.

„კონტექსტი, რაც თანამედროვე სიტუაციაში ჩვენ გვაქვს არის ის, რომ იცვლება მიწოდების ჯაჭვები, იცვლება გეოპოლიტიკური მოცემულობა. იმ სიტუაციაში, როდესაც „შუა დერეფანი“ იძენს იმ დატვირთვას, რა დატვირთვაც შეიძინა თუნდაც რუსეთ-უკრაინის კონფლიქტის შემდგომ ან ახლო აღმოსავლეთში მიმდინარე მოვლენების პირობებში. ამის უგულებელყოფა წარმოუდგენელია, ამის არ დანახვა არ შეიძლება.

ამას ემატება ის განვითარება, რომ სომხეთსა და აზერბაიჯანს შორის ათწლეულობის განმავლობაში მიმდინარე კონფლიქტი დასრულდა და ორივე მხარე ცდილობს, რომ იპოვოს თანამშრომლობის გზები და ითანამშრომლონ თუნდაც რეგიონული პროექტების კონტექსტში. რაც არის ახალი მოცემულობა ჩვენთვის. ეს არის ახალი შესაძლებლობები რეგიონისთვის.

შესაბამისად, ჩვენ შეგვიძლია ვთქვათ, რომ ერთის მხრივ მშვიდობა და სტაბილურობა რეგიონში, მეორეს მხრივ ეს ურთიერთობები, რაც არსებობს მეზობლებს შორის, ამ შემთხვევაში ვსაუბრობ საქართველო-სომხეთს, საქართველო-აზერბაიჯანს და ახლა უკვე აზერბაიჯანსა და სომხეთს შორის ურთიერთობებზე, რა თქმა უნდა გადამწყვეტ როლს ითამაშებს „შუა დერეფნის“ განვითარებაში, რაც შეიძლება მართლა ვთქვათ, რომ არის ისტორიული შანსი ჩვენი რეგიონისთვის, რომ მართლაც იქცეს უმნიშვნელოვანეს დერეფნად და უმნიშვნელოვანეს გეოპოლიტიკურ ადგილად არა მხოლოდ დაკავშირებადობის კუთხით. როდესაც ჩვენ ვსაუბრობთ ეკონომიკაზე, ეკონომიკურ პროექტებზე, რა თქმა უნდა ამის უკან დგას პოლიტიკა და ამის უკან არის გარკვეული პოლიტიკურ მნიშვნელობა“, - განაცხადა მაკა ბოჭორიშვილმა.