კახა კალაძე თინა ხიდაშელის ჩეხეთში რეგისტრირებული NGO-ს თაობაზე: თუ ამგვარ ფაქტს აქვს ადგილი, რა თქმა უნდა, რაღაც დასამალი აქვს

დედაქალაქის მერი კახა კალაძე მიიჩნევს, რომ თუ არასამთავრობო ორგანიზაცია ქართულ საქმეს ემსახურება, ეს საამაყო უნდა იყოს და ამის, არათუ დამალვა, პირიქით, აფიშირება უნდა ხდებოდეს.

როგორც კალაძემ დღეს ჟურნალისტებთან, თინა ხიდაშელის მიერ ჩეხეთში არასამთავრობო ორგანიზაციის რეგისტრირების შესახებ დასმულ შეკითხვაზე განაცხადა, ასეთი არასამთავრობო ორგანიზაციები, რეალურად ფულს იღებენ საქართველოს და ქართველი ხალხის მტრობისთვის.

„დეტალები არ ვიცი, თუმცა თუკი, ამგვარ ფაქტს აქვს ადგილი, რა თქმა უნდა, რაღაც დასამალი აქვს. თუ არასამთავრობო ორგანიზაცია გაქვს და ქართულ საქმეს ემსახურები, აკეთებ ქართველი ხალხის საქმეს, დასამალი რა არის, პირიქით, საამაყო უნდა იყოს. მაგრამ ყველაზე დიდი უბედურება ის არის, რომ ეს ვითომ არასამთავრობო ორგანიზაციები, რომლებიც ვითომ ქართულ საქმეს აკეთებენ, რეალურად ფულს იღებენ იმაში, როგორ უმტრონ საქართველოს და ქართველ ხალხს. თუ კარგ საქმეს აკეთებ, რატომ უნდა იყოს დასამალი? პირიქით, ღია უნდა იყო და აფიშირება გააკეთო იმ კარგი საქმეების, რაც გაქვს ჩაფიქრებული და მიზნად დასახული.

თუმცა, რეალობა არის ის, რომ ფულს იღებენ იმაში, როგორი ბოროტება გააკეთონ, როგორ წავიდნენ ქვეყნის წინააღმდეგ. ეს არის მოცემულობა“, - განაცხადა კახა კალაძემ.