იტალიაში ხვალ ეპიფანია აღინიშნება

ეპიფანია, იგივე თეოფანიას დღესასწაულს იტალიაში ქრისტეს შობიდან მე-12 დღეს, 6 იანვარს აღნიშნავენ.

იტალიის თითოეულ რეგიონს ამ დღის აღსანიშნავად თავიანთი ადათ-წესები და ტრადიციები აქვთ. თითქმის ყველა ოჯახში სუფრაზე ტკბილეულობით სავსე თასი შეგხვდებათ, შეხვდებით ასევე ბუხარზე ჩამოკიდებულ ტკბილეულით სავსე წინდასაც.

5 იანვრის საღამოს საათებში კოსტიუმირებული, სადღესასწაულოდ გამოწყობილი პატარები ჟრიამულით გვსტუმრობენ, რომლებიც აუცილებლად ტკბილეულით უნდა დავასაჩუქროთ.

ეპიფანიას დღესასწაულის წარმოშობა, პირველ რიგში ქრისტიანულ რელიგიას უკავშირდება. დასავლეთის ქრისტიანები, მათ შორის იტალიელი კათოლიკე ქრისტიანები ეპიფანიას დღეს, უმთავრესად აღნიშნავენ მოგვების სტუმრობას, ახალშობილი იესოს სანახავად. აღმოსავლეთ ქრისტიანებში, მათ შორის ჩვენთან, ახალი კალენდრის მიხედვით, 19 იანვარს იესოს ნათლისღებას იორდანეს მდინარეში აღვნიშნავთ.

იტალიაში, რელიგიურთან ერთად ამ დღის წარმომავლობა არაერთ ლეგენდას უკავშირდება. ბეფანა ეს იყო ხანდაზმული ქალი, რომელიც ცხოვრობს გამოქვაბულში. ჯადოსნური, მფრინავი ცოცხით ის ეშვება საკვამურებიდან რომ კარგ და დამჯერე ბავშვებს ტკბილეულობა მიუტანოს, ხოლო ცუდ ბავშვებს ნახშირი.

ამ დღისადმი მოგონებები ერთმა ხანდაზმულმა იტალიელმა ქალბატონმა გამანდო.  - ,,ბავშვებისთვის, ეს იმდენად დიდი დღესასწაული იყო, რომ მთელი წელი სულმოუთქმელად ველოდით. ყველას გვაინტერესებდა, რას მოგვიტანდა ბეფანა საჩუქრად. როდესაც ჩემი მშობლები წინა საღამოს ხმამაღლა საუბრობდნენ, მე მათ ვაჩუმებდი და ვეუბნებოდი რომ ხმადაბლა ესაუბრათ. წინააღმდეგ შემთხვევაში ბეფანა ჩვენთან არ მოვიდოდა და არც ტკბილეულობას დამიტოვებდა."

მეორე ლეგენდის მიხედვით ბეფანა, ხანდაზმული ქალი, ბეთლემისკენ მიმავალ გზაზე, სამ მოგვს შეხვდება და მათ გზა ჰკითხა. მოგვებმა უთხრეს რომ მათთან ერთად გაეგრძელებინა გზა, თუმცა უარი უთხრა. შემდეგ კი ინანა მათ რომ არ გაჰყვა. მოამზადა ტკბილეულით სავსე კალათა და მათი ძებნა დაიწყო. გზად შემხვედრ ბავშვებს ტკბილეულს სჩუქნიდა, იმ იმედით რომ მათ შორის პატარა იესოც იყო. ყოველ წელს აგრძელებს იგი მოგვების და იესოს ძებნას და ბავშვებს ტკბილეულით ასაჩუქრებს.

6 იანვარი, ეპიფანია, იტალიაში ეროვნული დღესასწაულია და უქმე დღედაა გამოცხადებული. ქვეყნის მასშტაბით არაერთი ღონისძიება იმართებოდა ეპიფანიას აღსანიშნავად და წელსაც მცირე, მაგრამ აუცილებლად გაიმართება სხვადასხვა სახის წარმოდგენები.

ExsclusivTv-ის რედაქცია ეპიფანიას დღესასწაულს ულოცავს ჩვენს კათოლიკე მეგობრებს.

ნონა გედენიძე სპეციალურად ExclusiveTV.ge-სთვის ემილია-რომანიადან

აგრეთვე დაგაინტერესებთ:

📌 Super Green Pass-ის გარეშე იტალიაში ვეღარ იმუშავებ?!

📌 „ასე გავხდი მუნჯი, უსიტყვო, უენო, სრულიად ნული... ოთხი წლის ბავშვით ხელში... უპუროდ და შიშით სავსე ჩემოდნებით“ - ემიგრანტი ჟურნალისტის ისტორია

📌 ემიგრანტი იტალიიდან: “კოვიდი მაქვს, მაგრამ კარანტინში ვერ დავჯდები, ჩემს შვილებს შიათ"