ვინ არის ილნაზ გალიავიევი, რომელმაც დღეს ყაზანის სკოლაში 9 ადამიანი მოკლა – დაკითხვის დეტალები, რას ყვებიან მასსზე კლასელები

დღეს რუსეთში, კერძოდ ყაზანში,  19 წლის ილნაზ გალიავიევი N175 -ე  სკოლას თავს დაესხა.

თავდამსხმელი თავის თავს ღმერთს უწოდებს. მან დილით, თავდასხმამდე გაავრცელა ინფორმაცია, რომ  მოკლავდა “უზარმაზარი რაოდენობის ბიონაგავს“, შემდეგ კი თავს მოიკლავდა.

თავდასხმის შემდეგ მისი ცოცხლად აყვანა შეძლეს, იგი დაკითხვაზე არაადეკვატურად იქცეოდა და იგინებოდა.

სოციალურ ქსელში გამოჩნდა ვიდეო თავდამსხმელის დაკითხვიდან. ის გისოსებზეა მიჯაჭვული, რათა გამომძიებლებსაც არ დაესხას თავს. დაკითხვისას ცდილობდნენ, რომ დაედგინათ თავდასხმის მიზეზი, თუმცა ჩანს, რომ ბიჭი საღ ჭკუაზე არ არის. გამომძიებლებს სახეში უყვიროდა, ის ყველაზე მეტად გაღიზიანდა, როცა დაკითხვისას ავადმყოფად მიიჩნიეს.

“2 თვის წინ თავი ღმერთად შევიცანი, ზაფხულში კი ჩემში მონსტრმა გაიღვიძა. მე ყოველთვის ყველა მძულდა და კიდევ უფრო შემძულდა. ეს ჩემთვის არავის უთქვამს, ჩემით მივხვდი,” – ყვიროდა დაკითხვისას ილნაზ გალიავიევი.

პოლიციის  ინფორმაციით, გალიავიევი დამოუკიდებლად მოქმედებდა.თავდასხმისას გამოიყენებული იარაღი მასზე იყო რეგისტრირებული.

ილნაზის ყოფილი კლასელები ყვებიან, რომ ის წყნარი და უკონფლიქტო ბავშვი იყო, თუმცა დაკითხვის ვიდეომ სულ სხვა რამ აჩვენა.

თავდასხმის შედეგად დაღუპულია 9 ადამიანი – 7 ბავშვი და 2 მასწავლებელი. დაჭრილია 21 ადამიანი.

ილნაზ გალიავიევი სკოლასთან დააკავეს, დაკავებისას მან სამართალდამცავებს განუცხადა, რომ მის სახლში ბომბი იყო დამონტაჟებული, თუმცა ეს შემოწმების შემდეგ სიცრუე აღმოჩნდა.

ოჯახის წევრების განცხადებით, გალიავიევი მორწმუნე არ იყო, ამიტომ ისინი რელიგიურ მოტივს გამორიცხავენ.

12 მაისი გლოვის დღედ არის გამოცხადებული. საგამოძიებო კომიტეტმა საქმე მასობრივი მკვლელობის მუხლით აღძრა.

რუსეთის პრეზიდენტის პრესსპიკერის განცხადებით, ყაზანის გიმნაზიაში მომხდარი ინციდენტის შემდეგ პრეზიდენტი სამოქალაქო იარაღის მიმოქცევის წესების სასწრაფო გამკაცრებას ითხოვს.