მინისტრის მოადგილე და საქართველოს ელჩი იტალიაში, მარკეს რეგიონის პრეზიდენტს და ანკონას მერს შეხვდა

▶ 29.12.21 ანკონა - იტალიაში სამუშაო ვიზიტის ფარგლებში საქართველოს საგარეო საქმეთა მინისტრის მოადგილე ვლადიმერ კონსტანტინიდი, იტალიაში საქართველოს ელჩთან, კონსტანტინე სურგულაძესთან ერთად, მარკეს რეგიონს ეწვია, სადაც შეხვედრები გამართა რეგიონის პრეზიდენტთან, ფრანჩესკო აკუაროლისთან და ქ.ანკონას მერთან, ვალერია მანჩინელისთან. 

▶ რეგიონის პრეზიდენტთან შეხვედრაზე განიხილეს მარკესა და საქართველოს, ასევე მის რეგიონებს შორის სავაჭრო-ეკონომიკური კავშირების დამყარების შესაძლებლობები. მინისტრის მოადგილემ პრეზიდენტს ინფორმაცია მიაწოდა საქართველოს საინვესტიციო გარემოს, ქვეყნის სატრანზიტო და ინფრასტრუქტურული შესაძლებლობების შესახებ. აღსანიშნავია, რომ მარკეს რეგიონის ეკონომიკა ძირითადად წარმოდგენილია განვითარებული მცირე და საშუალო ბიზნესით - „მარკეს მოდელი“ ერთგვარად თვითმყოფადი მოდელია, რომელიც არ არის დამოკიდებული არც სახელმწიფოს მხრიდან მხარდაჭერაზე და არც საბანკო სექტორის კრედიტზე. ეკონომიკის წამყვანი დარგებია - ავეჯის წარმოება, ფეხსაცმლის და ტანსაცმლის წარმოება, გემთმშენებლობა, თევჭერა, ტურიზმი. 

შეხვედრაზე განსაკუთრებული ყურადღება გაამახვილეს საქართველოს ოკუპირებული ტერიტორიების თემაზე და საოკუპაციო რეჟიმების წარმომადგენელთა პროვოკაციულ ქმედებებზე იტალიის რეგიონებში, სადაც ცდილობენ სავაჭრო, კულტურული და რელიგიური საფარის ქვეშ კონტაქტები დაამყარონ ადგილობრივ ინსტიტუციებთან და გაავრცელონ დეზინფორმაცია. შეხვედრაზე აღინიშნა მსგავსი ქმედებების პრევენციის და მათზე რეაგირების საჭიროება. 

შეხვედრაზე ისაუბრეს კულტურის სფეროში არსებული თანამშრომლობის და სამომავლოდ ახალი პროექტების განხორციელების მნიშვნელობაზე. კმაყოფილებით აღნიშნეს რეგიონში, ბოლო წლებში, საქართველოსთან დაკავშირებით გამართული კულტურული ღონისძიებები, კერძოდ, პეზაროსა და ურბინოში, და იმედი გამოთქვეს, რომ ეს თანამშრომლობა აქტიურად გაგრძელდება. 

▶ ანკონას მერთან, ვალერია მანჩინელისთან შეხვედრაზე საუბარი შეეხო ანკონასა და საქართველოს საპორტო ქალაქებს შორის კონტაქტების დამყარების და სხვადასხვა სფეროში თანამშრომლობის განვითარების პერსპექტივებს, ანკონაში და ზოგადად, რეგიონში წარმოდგენილ ქართულ დიასპორას, კულტურული კავშირების განმტკიცებას, საზოგადოებრივ-პოლიტიკურ სფეროში ქალთა აქტიურ ჩართულობას. შეხვედრაზე ხაზგასმით აღნიშნეს საქართველოს სუვერენიტეტის და ტერიტორიული მთლიანობის პატივისცემა და საოკუპაციო რეჟიმების წარმომადგენელთა პროვოკაციული ქმედებების პრევენციის საჭიროება.